المساعد الشخصي الرقمي

مشاهدة النسخة كاملة : شو طابخين اليوم . . ابو زهير


ابو زهير
28/01/2008, 03:02 مساء
من شان الله يانسوان العالم
ريّحونا شويّة وخبّرونا شو طابخين
اليوم وكل يوم
وهيك بنرتاح نحن الرجال من السيمفونية
اليوميّة شوبدنا نعمل أكل وشو بدنا نطبخ
وبنفس الوقت بنتذكّر الأكلات لأنو العقل
عم يروكب معنا بـ هاي الشغلة

رح بلّش انا

اليوم طابخين معكرونة و محشي الكوسا
:patch_cuisin: :patch_cuisin: :patch_cuisin:

ساره
28/01/2008, 03:05 مساء
لا يا بو زهير طبخة واحدة بتكفي منشان ما نصير مبذرين :)

وما تنسى بكرا تجيب اغراض البيتزا

alhayssam
28/01/2008, 04:57 مساء
فكرة حلوة أبو زهير
وخاصة للمتزوجين

ولكي يكون الموضوع مفيد أكثر
أتمنى ممن يشارك في الردود أن يذكر الطبخة وطريقة صنها

وهيك منكون على علم بالمكونات لحتى نجيبها من السوق

بدون وصفة طبية

ابن البلد
28/01/2008, 06:23 مساء
من لحظات خلصنا غدا

وكنا عاملين بيتزا .:patch_cuisin: ..في حدا ما بعرف كيف تنعمل البيتزا؟؟؟؟

برافو عليكم الكل بيعرفها معناها مافي داعي اشرح لكم المكونات والذي منو

لانو بالنهاية انا بعرف كبف بياكلوها بس ما بعرف كيف بيخبزوها :)

مير
28/01/2008, 08:45 مساء
والله ياابو زهير انت حطيت ايدك على جرحي لاني كل ماجبت مكبر الصوت وندهت بالبيت شوطابخين اليوم بيرتد الصدى طابخين زيتون وشاي مع اني ماباكل زيتون فبروح بطبخ لحالي زيت وزعتر ثم اضيف قليلامن الخيار حسب الطلب مع كاسة شاي حسب الرغبة :)

الدومري
28/01/2008, 09:02 مساء
أبو الزوز الغالي
أنت تعديت بهذاالموضوع على سيادة مطبخ منتدى الهيثم
طرح مواضيع الطبخ والنفخ تحتاج الى أنامل ذهبية
وليس أنامل الخناشير مثل حكايتي وحكايتك

بس بتعرف والله معك حق
بهذه الطريقه الواحد ما بيحتار وفورا بيختار
طبخة اليوم
وتوفر على الزوجة عناء التفكير والتدبير
والطبخ بالكفكير
:)

rory
28/01/2008, 09:32 مساء
عنجد أكبر مشكلة
يعني بس بدي قول إنو يمكن الشغلة مو خابطة بالرجال بس
لا واللــــــــــــــه و نحنا كمان كأفراد بالعائلة واقعة براسنا
الأب بقول متل ما بدكون والام بتقول متل ما بدكون
ومين آكلة غير نحنا
والله بينزعل علينا
بدي وجه شكر للأخ أبو زهير واشكروا ع طرح هيك مشكلة لأنو عنجد باتت تسبب بانشقاقات عائلية مدمرة
وإني أخاف المزيد
و أخيرا و ليس آخراً :بدي حث ع رأي أخونا جاغور و قول:
يا إخوتي الكرام عليكم بالزعتر
سلامي.............

سامو
28/01/2008, 09:54 مساء
ولو في أحسن من الزيت والزعتر
يعني فينكم تقلو بيض
تقلو بصل مع بيض والله طيبة
فينكم تقلو بطاطا وشوية كتشب
ولا شوووووووووووووووووووووووو
\\\ (http://www.alhayssam.net/vb/)
أبو زهير
من هلء بلشت تعاني كيف لما بصير عندك عر وجر
شوووو بتعمل
خخخخخخخخخخ

ضياء
28/01/2008, 10:17 مساء
أخي أبو زهير فكرة رائعة فكرة هالموضوع لأنو حتى نحن منرتاح من هالهم
بس لو فينا نعمل متل باب الحارة وننقل هالصحون بيشتغل بالحارة قصدي بالمنتدى
أكيد كلكن بتبعتولي وما حدا بيعتب علي اذا ما بعتت لأني موظفة ههههههه
المهم اليوم كنت طابخة أكلة طيبة كتير وسهلة كتير اسمها
شظ مظ ما بعرف اذا بتعرفوها يعني بالعربي (بيض بالبندورة )
الطريقة
بقطع البصل وبقليه بالسمنة البلدية
حتى يصفرأو يصير بين الأصفر والزهري
بكون مقشرة البندورة وفارمتها ناعم
ومقطعة قرن فليفلة خضرة (بعد التشريش )
بضيهن على البصل وبضعف الغاز لتنشف مية البندورة على مهلها
وبعدين وقت الأكل بفقش البيض البلدي فوقها وبقليون
وشوية مخللات جنبها
بتاكل أصابيعك وراها هههههههههههه

alhayssam
28/01/2008, 11:35 مساء
الله الله يا ضياء ذكرتينا بأيام العسكرية

وبالأكلة المشهورة جظ مظ

ليش في حدا ما بيعرف الجظ مظ

أغلب الشباب بيطبخوها لما كانو عزابية

وبعد الزواج كتير رجال بطبخوها

بتعرفو ليش

آل لحتى يتذكرو أيام العسكرية..


وهنن بكونو عم يحنو لأيام العزوبية

:) :)

ابو زهير
28/01/2008, 11:55 مساء
إي شو هاد شو هاد ما كنت متوقّع هيك
يظهر الكل بيحبّوا الأكل وما عاد يستحملوا
كلمة طبيخ

يا دومري نحنا الرجال دائماً متميزين بكل
شي حتى بالطبخ

يا جماعة أنا بدّي كل واحد بيرد
يذكر شو طابخين اليوم

:patch_cuisin:

ضياء
28/01/2008, 11:55 مساء
:mad:
تحية الك يا أستاذي منيح هلي وضحتلي
هلق عرفت ليش زوجي بموت على جظ مظ
بس بكرة بدي أطبخ ملوخية بالموزات على مية العضام
بدكون اشرحلكون كيف بطبخها
ولا أكيد بتعرفوا لأنها أكلة مشهورة

ليلى ملك
29/01/2008, 12:33 صباحاً
تعرفو انا احب شيئين بالدنيا كلها
الطبيخ و الشعر
ههههههههههههههههه
طبعا رح تسألوني :
شو جاب لي جاب؟؟
و انا رح احكي لكم :
في الطبيخ احس حالي متبارية في مسابقة مهمة جدا و الناس تتفرج علي
ولازم ابرهن عن مهاراتي و اكتشافاتي و اختراعاتي ....
الوان و اشكال و روائح و اذواق و بهارات
لحتى يطلع احلى طبق
لما اسمع تشكرات العيلة بحس حالي طايرة في السما .
و الشعر نفس الشيء: كل الاحاسيس الجميلة بدها تطلع معي.
ولما انتهي مابرتاح حتى اعرف رأي كل الاصحاب فيها.
//
بعد هذه المقدمة الطويلة اشكر ابو زهير كثيرا على موضوعه و فكرته الرائعة و يسعدني ان اقدم لكم كل مرة طبخة حلوة.
//
طبخت سمك مشوي و مقليات من البادنجان و البطاطس و البندورة و اليكم الطريقة من غير مقادير لانها سهلة:
-بادنجان: قطعته نصين على الطول و عملته شرائح متوسطة السمك على الطول طبعا .في طبق عملت خليط من طحين و ملح و فلفل و زعفران و شوية ماء و ثوم مدقوق .يعني سائل ثقيل .غمست فيه قطع البادنجان و قليتها بالزيت .
-بندورة قطعتها نصين و رشيتها ملح و فلفل و قليتها كمان بالزيت
-بطاطس اخترت نوع صغير جدا قطعته نصين بس و قليته.
-اما السمك اليكم طريقة سهلة بالشوي و ماتترك ريحة قوية بالبيت:
نغسل السمك و نحط له بهارات وقزبرة .
في مقلاة فوق النار نرشها بدقيق سميد و ننزل السمك من غير زيت .لا تقلبو السمك قبل ماتستوي
حتى لا يلتصق.في طبق ارش بصل مقطع على الطول و انزل فوقه السمك المشوي....لذيذ جدا.
صحة و هنا

ابو زهير
29/01/2008, 03:46 مساء
شكراً ضياء ملوخية طيبة كتير بالموزات

وليلى ملك أنا أتوقع أن تتابعينا بهذا الموضوع
لأنك مشهورة بأكلاتك الطيبة تسلمي
وهالمشكلة هاي أصنّفها من ضمن
المآسي العصريّة للأزواج

اليوم مرتي طابخة يخني البطاطا بالمرقة واللحمة والرز

لا تسألوني كيف بتنعمل لأنو ما بعرف

ملاحظة بعد تجميع الأكلات سأقوم بوضعهم ضمن صفحة واحدة

عبير الورد
29/01/2008, 04:08 مساء
اليوم أنا طابخة كبسة بالدجاج وسلطة خضار
ومافي داعي اشرح الطريقة لأني منزلتها بمنتدى الطبخ
:patch_cuisin:

ليلى ملك
30/01/2008, 04:32 صباحاً
تسلم ابو زهير

//

عمركم جربتو عصير الافوكاتو من غير افوكاتو ؟؟؟!!!!

ههههههههههههههه
خوذو هذا اكتشاف رائع و رخيص و لذيذ:

- قطعة بطاطس
- قطعتين كوسة خضرا
الكل مصلوق في الماء

لما يبردو نحطهم في الخلاط مع حليب و سكر و فانيليا و كوب ياغورت(بظن اسمه زبادي ؟ ) بنكهة الموز .
بيطلع مثل عصير الاافوكاتو تمام.
///
صينية خضر مصلوقة :
ذرة-جزر -بطاطس-و بازيلاء-و كوسة .
ندهن صينية بالزبدة و ننزل الخضر المصلوقة المقطعة صغيرة .وقطع المرتديلا.نحط فوقها البيشاميل
و نرشها بالجبن المحكوك او المبشور او قطع عريضة ورفيعة.
نحمرها بالفرن

وصحة و هنا


يلي مابعرف يعمل البيشامل ممكن نقدم له شرح بسيط جدا .

الباشق
30/01/2008, 04:53 صباحاً
لشو عذاب القلب

أبو زهير لسا في أسرع من هيك

بلا طبخ وبلا نفخ

10بيضات+قرصين بندورة+رشات ملح000رشات+ صحن خيار مكبوس=أحلى جز مز


ولا منية حدا:) :patch_lf:
:patch_omlt: :patch_omlt: :patch_omlt:

alhayssam
30/01/2008, 10:48 صباحاً
- قطعة بطاطس
- قطعتين كوسة خضرا
الكل مصلوق في الماء

لما يبردو نحطهم في الخلاط مع حليب و سكر و فانيليا و كوب ياغورت(بظن اسمه زبادي ؟ ) بنكهة الموز .
بيطلع مثل عصير الاافوكاتو تمام.
///
صينية خضر مصلوقة :
ذرة-جزر -بطاطس-و بازيلاء-و كوسة .
ندهن صينية بالزبدة و ننزل الخضر المصلوقة المقطعة صغيرة .وقطع المرتديلا.نحط فوقها البيشاميل
و نرشها بالجبن المحكوك او المبشور او قطع عريضة ورفيعة.
نحمرها بالفرن

يسلمو ليلى ملك
عجبتني واليوم رح نجربها
انا رايح حضر المطلوب

عنا البازيلا وعنا الجبن
والباقي ساعة زمن وبكونو حاضرين

كتر خيرك ابو زهير والله فكرتك حلوة
لا تتعذب ولا تحتار أبو زهير أبو الأفكار

ابو زهير
30/01/2008, 04:53 مساء
تسلمي يا ليلى ملك أكلات شهيّة بالتأكيد
شو صار معك أستاذ جربتها للوصفة خبّرنا
أحلى باشق والله . . يا عمي بيضل الجزمظ غير شكل
شوبدنا

اليوم عامل تصفية على الأكل البايت من الأمس

عبير الورد
30/01/2008, 05:32 مساء
والله اليوم أنا عاملة أكلة ما بعرف شو اسمها بس انا بقلها فطر ودجاج
بما أنو باقي عندي فروج من الكبسة فقلت منعمل عليهن طبخة
:) \ اقتصادية \
المكونات
صدور دجاج مسلوقة ومقطعة \ بدون عظم \
علبة فطر معلب
عدد 3 فليفلة خضراء مقطعة دوائر
عدد 3 بصل مقطع دوائر
ملعقتين طحين
بهارات كبسة
ملعقة دبس بندورة
الطريقة
يوضع قليل من الزيت في مقلاة ويقلي البصل
وبعد أن يحمر قليلاً توضع فوقه الفليفلة الخضراء ويقلبوا حتى تذبل الفليفلة
وبعدها نضع الفطر بدون الماء الموجود في العلبة
ونضع ملعقة بهارات كبسة فوق الخليط
ونضع المكونات كلها فوق الفروج المسلوق مع مرقته فوق النار
بعدها نضع ملقعة دبس بندورة مع الطحين
ونترك الطبخة تغلي لمدة نصف ساعة تقريباً
ويطبخ معها رز مع عصفر
وصحتين وهنا
:patch_cuisin:

ليلى ملك
30/01/2008, 10:08 مساء
اظن انكم سمعتم عن اكلات مغربية اسمها طاجين كذا او طاجين كذا ؟
في الاصل الطاجين هو قدر معه غطاه مصنوع من الطين المطبوخ اي قابل لوضعه فوق النار
نحنا نطبخ فيه اكلات و كمان بيكون هو نفسه طبق للتقديم
رح فرجكم صورة طاجين .

http://z22r.com/up/uploads/56fa97c722.jpg
والاكل متنوع كثير يلي ينطبخ فيه اتعودت الناس تسميه بالطاجين اي:
نقول طاجين لحم بالخضار
طاجين دجاج بالبصل المعسل
........
اليوم رح احكي لكم عن طاجين جزر و زيتون احمر و حامض ليمون مخلل.
نحتاج ل:
-لحم دجاج مقطع
-جزر حسب الرغبة مقطع مثل الاصابع
-بصلة مفرومة
-بقدونس او معدنوس مفروم
-طماطم واحدة بس
-بهارات و زيت زيتون وملح....
//
نحط الدجاج و البصل و المعدنوس و ثوم و بهارات و زيت و نقليهم في طاجين .نضيف طماطم مقطعة صغيرة.
نظيف شوية ماء و لما يغلي الماء نضيف الجزر و نغلق طاجين و نتركه ينضج .نضيف حبات الزيتون و قشرة (فقط) الحامض الليمون.وبعد 5 دقيقة نشيل الطاجين .
وصحة و هنا

ضياء
31/01/2008, 02:15 صباحاً
أختي ليلى ملك
كم طاجين بدك تجيبي معك الى سورية هههههههههه
أنا اليوم طبخت معكرونة بالبشاميل
بس أكيد بتعرفوا كيف
تحياتي لكم جميعا

ليلى ملك
31/01/2008, 04:48 صباحاً
لا تكلي هم اختي الغالية ضياء
الخير موجود بحمد الله
و كمان فيه اشكال صغيرة جدا للطاجين
هي للديكور بس
تسلملي ابتسامتك:)

ابو زهير
31/01/2008, 04:48 مساء
بس تجي لعنا يا ليلى ملك اعملي
حسابك رح تتطبخيلنا الطاجين هاي

اليوم طابخين رز وبامية باللحمة

مير
01/02/2008, 02:35 صباحاً
عم قول لحالي في ريحة شويط بالمنتدى وعصافير بطني ليش عم يستغيثوا ما عم بعرف ما تاري في طبخة عم تنطبخ وابو زهير الشيف طيب عزمونا يعني معلشي قولوا في عصافير بريئة شوذنبها يعني شم ولا تدوق
:patch_cuisin:

ليلى ملك
02/02/2008, 09:07 مساء
اخي جاغور
ولو انه واجب اكرام الضيف
بس انت هلاء صرت مننا فادخل واختار الطبق يلي يناسبك و صحة و هنا :):)
//
طبخنا رز مشكل :

-نصلق او نبخر الرز
-لما يبرد نضيف اليه الاتي=
-جوز مكسر ارباع او قطع صغيرة
-ذرة
-باميا مصلوقة
-جبنة بكل انواع(قطع صغيرة-و مرتدلا حمرا و غير حمرا)
-ماييونيز
-ملح +فلفل+زيت
-رشة سمسم
-يخلط الكل و نضعه في صينية الكيك الفارغة من وسط و نضغط بالاصابع حتى ياخذ شكل القالب ثم نقلبه في الطبق.
-او نضع الخليط في قوالب صغيرة مسبقا اذا كنا نفضل تقديم اطباق منفردة .
صحة و هنا

مير
03/02/2008, 01:13 صباحاً
كلك ذوق اخت ملك
ابو زهير جيب الجفت والحقني
قررت اتخلص من هل العصافير
قال عصافير قال ولك هدون غربان
واذا ما تغديت فيهم رح يتعشوا فيني
جيب الجفت بسرعة بركي منرجع بكام
بطة من هل الحيوانات اللي ببطني
بركي بتحشيلنا اياهم
الاخت ملك :)
:14_6_13[1]:

ضياء
03/02/2008, 03:08 صباحاً
اليوم أنا طبخت
صيادية وفتوش
وأكيد معروفين والكل بيعرف يطبخهن
لكم تحياتي

ليلى ملك
03/02/2008, 05:29 صباحاً
يا ضياء انت و عبير و ابو زهير حرام عليكم
يعني انا بتعب منشان اطبخ بالبيت
و اتعب منشان اشرح لكم
وانتم كل ما يحط حدا منكم اكلة بوقع تحتها
// وطبعا عارفين كيف تنطبخ //
شو حضرتكم شايفيني قاموس اكلات عالمية ؟؟؟؟
انا بحذركم هااااااااا
اذا ما عذلتم طبخاتكم و شرحتم الطريقة
رح اكتب كل شيء بالمغربي
وخليكم لا بطولو العنوان و لا الاكلة نفسها
بلا صحة بلا هنا بلا زفت
:):):):)

ابو زهير
03/02/2008, 04:52 مساء
طولي بالك يا ليلى ملك والله نفَسَك على الأكل غير شكل

يعني والله العظيم أنا بالذات معذور لأني حطيت الموضوع

لحتى أخلص من كتر النق اليومي شو بدنا نطبخ اليوم

وبأكدّلك إني ما بعرف شو هنن الوصفات بس بعرف

جيبها عل البيت وشوف أم زهير محضّرة الطبخة

ويالله عل الأكل يعني صدقاً عم أستفاد من هالموضوع غير شكل

وعندي عتب على الأخوة اللي عايشين بسوريا وخصوصاً
بجبلة وبالأخص الأخص بنات المنتدى
يظهر ما عم يطبخو شي ببيوتهم أو ما حابيّن يقولوا أو خجلانين

أنا اليوم عل الغدا ( مبطبطها ) يعني الأكل كلو بطاطا ( بطاطس مسلوقة )
شي بالبيض وشي بالحامض والثوم وشي
بطاطا مقليّة بالمرتديلا
لأ لأ باللحمة المرتديلا ما عاد جيبها
:) :) :) :)

ضياء
03/02/2008, 10:34 مساء
حبيبة قلبي ليلى ملك
معك حق
يبدو أنو قلة المروة مصيبة
بس من هلق ورايح رح فصل الطريقة
لعيونك يا غالية
لك تحياتي

ليلى ملك
04/02/2008, 12:04 صباحاً
ولا يهمك حبيبتي ضياء
انت بعتي لي بس موضوع بالحبر السري و انا انزله بمعرفتي
هههههههههههههههه
شو ابو زهير ؟ اذا مابتعرف انت من شو متكونة الطبخة اسأل مدام ابو زهير وهي تقلك و انت انشره .
//
رح اطبخ هلاء شيء جديد بس احكي لكم عليه بعد مانتعشا منسان ما تحسدونا
هههههههههههههه
لما ارجع احكيلكن صحة و هنا
:):):)

ابو زهير
04/02/2008, 02:33 مساء
:36f6: :sm282: :rolleyes: :patch_cuisin: :36_1_43:

عبير الورد
04/02/2008, 05:48 مساء
اليوم كانت الطبخة رز وفاصوليا حب
الطريقة
نسلق اللحم ونزيل الطبقة الأولى عنه
وبعدها نغسل الفاصولياء الحب ونضعها فوق اللحم
بعد أن تنضج الفاصولياء نضع لها دبس البندورة ونتركها تغلي حتى تتماسك المرقة قليلاً
بعدها نحضر الزيت أو السمن ونضعه في مقلاة ثم نضع فوقها ثوم مع كزبرة مطحونة مع دبس فليفلة ونقليهم حتى نشتم رائحتهم الزكية
ثم نضع مافي المقلاة فوق الطنجرة
نتركها تغلي قليلاً ثم نتناولها مع الرز بالشعيرية

صحتين وهنا
همسة
مع أنو الكل بيعرف كيف بتنطبخ هالأكلة بس كتبتها منشان الغالية ليلى ملك
:)

ضياء
04/02/2008, 11:43 مساء
أختي الغالية عبير
شو ما بتسلقي الفاصوليا مع ورقتين غار (ليروحوا التفخة )
أنا بنقعها قبل يوم وبعدين بسلقها
وجربي شوي شوبصل صغير وضيفيهن للخليط رح تدعيلي
همسة شوي البصل بالشعالة تبعيت الفحم أو بالفرن
لك تحياتي
أنا اليوم عملت هندبة مقلاية بالبصل وكمان بطاطا بالكزبرة والتوم
الهندبة :بعد التقطيع والغسيل جيدا ثم السلق
أملحها وبجيب مقلة وبقطع فيها طرنشات بصل وبقليهم بالزيت (زيت زيتون )
بشيل البصلات المقلية وبفردهن بصحن حتى يبقو محمصين وما يلينو وبقلب الهندبة بالزيت الحامي شوي وبسكبهن بالصحن وبزينهن بالبصلات مع عصرة حامض
مممممممممممم أكلة
أم البطاطا بالكزبرة والتوم بس أرجع من مشواري مع زوجي بعلمكن ياها
باي باي

ليلى ملك
05/02/2008, 05:02 صباحاً
شكرا كثير للغالية عبير الورد
والقمورة ضياء
طبخكم لا يقل طيبة ولذة عن طبيخنا .
اكلنا زعلوكة ههههههههههههه

-بادنجان مقشر سطر اي و سطر لا يعني مثل المخطط
-بقدونس +ثوم+بهارات و زيت زيتون.
-علبة بندورة او بندورة طازة مقطعة.

نقطع البادنجان قطع صغيرة و البندورة و نضيف الباقي و نخليهم يطبخو في مقلاة .
نضيف نصف كاس ماء. ونظل نحرك حتى يختلط الاكل ونهرسو و يصير مثل المعجون المهم ماتكون فيه مية.هي منستعملها كنوع من السلطات .
صحة و هنا

ابو زهير
05/02/2008, 02:10 مساء
عجبتني هاي الزعلوكة
لازم جرّبها
رح نطبخ اليوم رز ودجاج
معروفة للجميع
بنطبخ الرز طبخ عادي وبنحط فوقو
الدجاج المسلوق مع المكسّرات من جوز ولوز وصنوبر

وبحب أنا جنب هالأكلة مرقة الدجاج المسلوق
أو اللبن

ليلى ملك
06/02/2008, 04:36 صباحاً
انا من يومين تعبانة و ما عم اقدر لا اطبخ و لا اكل شي

أماني
06/02/2008, 02:15 مساء
غدائنا اليوم سلطة و شربة فريك

السلطة تتكون من
الفلفل الأخضر
الطماطم
الملفوف
زيتون
تن (تونة)
مع القليل من الزيت
الحامض
و المايونيز

الطريقة معروفة لدى الجميع

شربة فريك

300غ لحم خروف ( ممكن نعوضه بصدر دجاج)
150 غ فريك
بقدونس
4 ملاعق زيت
ملعقة صغيرة فلفل احمر مرحي
ملعقة اكل معجون طماطم
ثوم مدقوق
بصلة صغيرة


نقلي اللحم المقطع قطع صغيرة مع البصل في زيت الزيتونه ثم نضيف الطماطم ونصف كوب ماء
ثم الفلفل المرحي ونتركهم 10 دقائق
ثم نغسل الفريك ونضيفه للمرق مع لتر ونصف ماء ونتركه ساعة على الاقل مع المراقبة من حين لاخر
والتحريك حتى لا تلتصق حبات الفريك في قعر الطنجرة
نضيف بعدها الثوم والبقدونس مقطع وذلك قبل نصف ساعة من استواء الطبخة
تقدم ساخنة مع اليمون

والفريك هو الشعير المحمص والمنخول اي ان حباته تصبح صغيرة وناعمة عندئذ نستعمله في الشربة

ابو زهير
06/02/2008, 04:08 مساء
سلامتك ألف سلامة ليلى ملك

وشكراً أخت أماني الرائعة على مشاركتنا

بطبختنا اليومية

ابو زهير
16/02/2008, 11:33 مساء
شو القصّة بطلتوا تطبخوا بغيابي

الباشق
17/02/2008, 07:59 صباحاً
كنا معزومين عند دانا خيووووووووووووو

كل يوم طبخ؟؟؟؟؟

الله لايروك على هالعزيمة

ئال تعوا افرموا بقدونس؟؟

كني مفكرينا طبيخين عن جد خيووووووووووو


إش طيبخ أبو زهير؟؟


:) :)

ابو زهير
17/02/2008, 04:07 مساء
دخيلك يا باشق إذا كانت دانا شاطرة بالطبيخ

جيبها لعنّا لهون بلكي بتفيدنا بشي طبخة

:patch_cuisin:

dana
18/02/2008, 12:23 صباحاً
وأنا عم بقول في حدن عم بيحكي
علي ومالي دريانة
هيدا إنتو
((أخي أبو زهير والباشق))

هلق أنا قلتلكم عازمتكم
بس مين قال إني أنا اللي
رح أطبخ
:) :)
أنا ما بعرف أطبخ

إلا إذا حابين أتعلم فيكم

تحياتي

ضياء
18/02/2008, 12:51 صباحاً
أنا اليوم طبخت سمكة حرة
بتجيب السمك (لازم يكون كبير ومهبر )وبتقليه نص قلية أكيد بعد التمليح
وبتكون محضر الصلصة التالية
توم وفليفلة ممروسة حرة وكزبرة ناعمة وجوز ناعم وزيت
بتضيف الصلصة للسمك مع شوية ماء وتضعه بالفرن بعد نصف ساعة تضيف الليمون الحامض حسب الطلب
عبد استوائها تزينها بالبقدونس والصنوبر
أكيد منعمل جنبها سلطة خضار وصيادية رز
وصحتين
أنواع السمك المفضل استخدامه هو :اللقص أو سفرنة أو سمك أسود
لكم تحياتي

ابو زهير
18/02/2008, 06:06 مساء
له له له يا دانا معقولة ما بتعرفي تطبخي
بعرفك متل الزبدية الصيني ميبن ما رنّيناك بترررني

ورررررررن

ضياء ذكّرتيني بأكلة كتير طيبة على قلبي
السمكة الحرّة
بس هاليومين ما في سمك لأنو البحر ما شاء الله
موج عالي وطقس ماطر والصيادين نايمين

ليلى ملك
18/02/2008, 06:47 مساء
دجاج مشوي في قضبان او السيخ مثل مابدكم:

-صدور دجاج او ديك رومي مقطع مربعات صغيرة .
-بصلة مفرومة
-بقدونس او معدنوس مفروم
-ملح-فلفل-كمون-زيت -

نخلط كل المقادير مع بعض و نخليها بالثلاجة شي ساعة تتخمر
او يستحسن نخلطهم ليلة كاملة.

نضعهم في القضبان او السيخ ونشويهم مثل طريقة اللحم.
//
نقدم معهم سلطة متنوعة :
شمندر احمر ( نحنا نسميه باربة) مصلوق
2جزر مصلوق
2بطاطا مصلوقة
شوية بازلاء مصلوقة
كاس رز مصلوق
2 طماطم
1 خيار
الكلك يقطع على شكل مربعات صغيرة
نفرش اوراق الخس في طبق كبير ونحط كمية من كل نوع في جانب .يعني بطاطا لحالها و الجزر جنبها و الشمندر و هيك.....
وفي وسط الطبق نحط رز مع معدنوس
نعمل مخلل من خل و زيت و حامض و فلفل و ملح و نخلطهم و نرش طبق السلطة

الف صحة و هنا

ضياء
18/02/2008, 09:36 مساء
بما أنو مبارح طبخت سمكة حرة وهي أكلة دسمة (ماديا وصحيا )
منشان هيك اليوم طبخت بيض بتوم
طبعا توم أخضر معروف للكل واكلة ما في :patch_cuisin: أطيب منها
لكم تحياتي

الملكة
18/02/2008, 10:40 مساء
سلام
طبخت اليوم معكرونة بالكاري
المكونات :معكرونة سباكتي(عادية)--جزر --بندورة -- فليفلة خضراء --بصل ----كاتشب--بهارات الكاري
طريقة التحضير:نقطع الجزر قطع صغيرة ------نقطع البندورة والفليفلة ايضا قطع صغيرة
والبصل ايضا
نضع في الطنجرة كمية من الزيت مع البصل حتى يصبح لون البصل اصفر --- ثم نضع الجزر والبندورة والفليفلة فوق البصل ونتركهم على النار الهادئة حتى تنضج ونضع معلقة من الكاري البودرة
في هذه الاثناء نكون قد قطعنا المعكرونة وسلقناها ثم نضعها فوق الصلصة المطبوخة
لمدة عشر دقائق ثم نضعها في وعاء يوضع في الفرن لمدة ربع ساعة فقط
وبالهنا ان شاء الله

ضياء
18/02/2008, 10:45 مساء
بس ما قلتيلنا
الكتشاب وين منحطو قبل الفرن ولا بعد
لك تحي:patch_cuisin: اتي

ابو زهير
20/02/2008, 02:41 مساء
اليوم طابخين فروج بالبطاطا

تقلى البطاطا نصف قلية وتوضع في صينية
وفوقها قطع الفروج ويذوّب معها بالماء قليلاً من
دبس البندورة ( معجون الطماطم ) وقليلاً
من معجون الفليفلة والزيت والملح حسب الطلب
وتوضع بالفرن إلى أن ينضج الفروج

وألف صحة وهنا على قلبكم

عبير الورد
20/02/2008, 02:51 مساء
ونسيت يا أبو زهير الثوم والحامض
:)
هو اللي بيعطي كل النكهة

ابو زهير
20/02/2008, 03:23 مساء
استرينا الله يستر عليكِ

إي والله انسيت التوم والحامض

نحنا الرجال ما بنعرف نطبخ بنعرف
ناكل وبس ههههههههههه

:patch_cuisin: :patch_cuisin: :)

أماني
20/02/2008, 03:47 مساء
ألف صحة ان شاء الله

أنا اليوم عاملة كمونية


المقادير:

1كلغ لحم خروف (منزوعة العضم)

كبدة
كاس زيت
بصل
1 طماطم معجون
نصف خاشوقة أكل فلفل أحمرمرحي
قليل من الفلفل الأكحل
خاشوقة صغيرة ملح
خاشوقة صغيرة كمون

الطريقة :

يقع تقطيع اللحم والكبدة قطع صغيرة البصل قطع صغيرة ثم يوضع في قدر الطبخ مع إضافة الزيت ويقلى على النار
عندما يحمر البصل يقع إضافة البهارات ماعدا الكمون
بعد التقلية يقع إضافة الماء ويترك لينضج
قبل النضج ب 5 دقائق نضيف الكمون ويقدم للأكل نزينه بالبقدنوس.

ابو زهير
20/02/2008, 09:47 مساء
عجبتني منّك هاي الخاشوقة

ماشي حالك يا أخت أماني عم تدرسي
منيح اللغة الجبلاوية

بس شو هية أحمرمرحي
و الفلفل الأكحل

أماني
20/02/2008, 10:21 مساء
تلميذتكم أنا أخي أبو زهير

:):)

الفلفل الأحمر مرحي

http://www.oklamina.org/Images/Paprika.jpg

و الفلفل الأكحل : البهار

http://www.hawahome.com/vb/nupload/10342_1173269002.gif

ابو زهير
21/02/2008, 10:38 مساء
بكرا الجمعة مارح نطبخ شي

لأننا حجزنا بإستراحة أماني وعبير الورد

حسناء
22/02/2008, 12:31 صباحاً
احنا بكرة عاملين كسكس مغربي
ياسلام عليه
يالا انا عزماكم كلكم
و الغي الحجز يا ابو زهير شو رائيك انا عزمة الجميع بمناسبة ترقية ابو زهير

أماني
22/02/2008, 01:48 صباحاً
انا اليوم ما طبخت شيء

كان عندي أكل من البارحة

و أمي بعثت أكل

ابن البلد
02/09/2008, 01:31 صباحاً
اولاً كل عام وانت بالف خير ورمضان كريم عالجميع

اما بعد

اليوم كنا طابخين ملوخية مع اني ما بحبها

طبعا ما نقدر ننسى الفتوش سيد الموقف ومقلي البطاطا والكبة النية والشوربة

وسباكيتي باللبن

بس انتو ؟؟


ما قلتولي شو طابخين اليوم ؟؟؟؟؟؟

غيمة عطر
02/09/2008, 03:22 صباحاً
اليوم كنت معزومة ع الافطار عند عمي

وحبيب قلبي ما قصّر بنوب

فتوش وكبة ومقالي ومن كله

هلا
02/09/2008, 04:17 صباحاً
كل عام وأنتم بخير
اليوم كنت معزومة عند أهلي أنا وأولادي
طبعا فطرنا فتوش وشوربة كبة نية
ومحاشي بأنواعها كوسا با نجان وورق عنب
ياريتكم معانا تفضلوا معزومين

ابو زهير
02/09/2008, 07:24 مساء
كل عام والجميع بألف خير

اليوم رح يكون على طاولة الإفطار إن شاء الله

فتوووووووووووووووووووش
وشوووووووووووووووورربة
وتمر وعصير الفريز ومياه باردة تلج
والطبخة الرئيسية رح تكون شاكرية مع الرز
الشاكرية ( لبن مطبوخ مع لحمة )

جوعتونا ...... :patch_cuisin:

القسامي
02/09/2008, 07:34 مساء
ان شاء الله ألف صحة وهنا على قلوبكم جميعا

ربنا يزيد النعم ويبارك فيها

بس ترى لاتنسوا قبل أن تأكلوا أن تشكروا الله تعالى على هذه النعم

وأن تدعوا لاخوانكم المستضعفين في الأماكن المغتصبة من الصهاينة و المحتلين

وتضرعوا الى الله تعالى بأن يطعمهم ويسقيهم ويكسوهم ..
ويلطف بحالهم فإنهم ضعفاء وبحاجة للدعاء


واسألوا الله دوام النعم

ضياء
03/09/2008, 02:52 صباحاً
كل عام وانتو بألف خير
اليوم الأول من رمضان كنت طابخة محشي ورق العنب طبعا مع العيران
الله يديمها نعمة ويرزق كل الفقراء والمحتاجين
اما اليوم فنوعت الفتوش مع الشوربة والكبة النيةو صحن حمص
بس بدون طبيخ :)

ابن البلد
03/09/2008, 05:05 صباحاً
السلام عليكم

والله انا اليوم كنت معزوم على الكة ورق عنب وفوقها عصاعيص ممممممممممممممممممممممم غير شكل


أي لكن انا دلوع حماتي


المهم كان مع ورق العنب في فتوش وشوربة وبطاطا مقلية وجاط فته شغل عمكن عدلة أنما ايه ممممممممممم

كانت سفرة بتشهي في الحقيقة والله لا يحرم حدا نعمته يا رب

ابو زهير
20/01/2009, 03:20 مساء
اليوم طابخين

صيّاديّة بالسمك

مممممممممممممم

أماني
20/01/2009, 05:16 مساء
طبخت اليوم

كسكسي بالخضرو السمك

ياسر ياسمين
20/01/2009, 06:14 مساء
مقلوبه الباذنجان مابحبها
:p :36_1_44: :p

هلا
23/01/2009, 03:30 صباحاً
اليوم كنت معزومة على بستان زميلتي


على الغدا كبسة ورز وملوخية

عبير الورد
23/01/2009, 02:12 مساء
بطاطا على دجاج بالصينية

ابو زهير
24/01/2009, 03:12 مساء
اليوم طابخين أكلة كتيرررررررررر

طيبة

بيقولولها شيخ المحشي

ضياء
26/01/2009, 12:00 صباحاً
اليوم أكلنا طبيخ مبارح:)
كنت عاملة عزيمة غير شكل لاهل زوجي كلهم وطابخة كرشة او سخطورة او اشة ما بعرف شو بتسموها
المهم انها اكلة
أكيد مولحالها معها كبة وورق عنب ملفوف
المهم أنو الكرشة هي الصنف الرئيسي :patch_cuisin:

ابو زهير
01/02/2009, 03:30 مساء
اليوم طابخين فاصولية خضرا

بالزيت

ابن البلد
15/08/2010, 12:42 صباحاً
مجموعة مقالي وشيخ محشي البازنجان

والفتوش المعتاد


وانتو شو كنتو طابخين اليوم ؟

د. ندى
15/08/2010, 01:32 صباحاً
نحنا كنا عاملين ... شوربة خضر و فتوش و شيخ المحشي الباتنجان و رز وفتة مكدوس و عصير تمر هندي ...

ليلى ملك
15/08/2010, 02:27 صباحاً
بالمغرب نحن نفطر على الخفيف مثل اي فطور عادي:

حليب و تمر و عصير و حلويات .

بعد صلاة العشاء يكون هناك طبق رئيسي اليوم ان شاء الله طاجين دجاج بالقرع ( كوسة) و الجزر.


وانتم ماذا طبختم اليوم؟